شنو واقع ببلادي
ف بلادي
واحد طالع واكل نازل واكل بحال المنشار
و واحد راجـع خـايب نـايب للدار
المرفح قايد و المكفح عايش عيشة الذبانة
يدور حتى يعيى يلوح صباطو من حر الصيبانة
من الأرض و من السما تنزل عليه الضرائب
بالشمع يضوي و مع السقاية تلقاه مضارب
الزمـان عـطى ظهــرو للمحتاج
و علـــى راس الشبعـــان حاط التـاج
ف بلادي
ولد الجـــاه يقـــرا بركــوب الطيـارات
ولد المزلوط للمدرسة يضرب الكيلومترات
ولادهــم يلبســو كل نهار المـوديلات
ولادنا نهار و ما طال يتسراو ف الجوطيات
كبادهم ماصين من عين القربة بلا حساب لفريك
دياولنا يقلبو على ما وتاهم بشركة ستي بديك
ف بلادي
القطاطـــعية يعصـــرو الحولي و يقطــروه
و احنـــأ بالجوع نفخــو الدماغ حتى نطيروه
هما يتنافسو على آخر الفيلات و الطموبيلات
و الدراوش المخير فيهم لا دوا لا فين يبات
درتي كروسة او بعتي الديطاي شيبك يطرطق
يتبعوك عليها و ريبــو دارك بحـــالي سارق
ف بلادي
الكبيــر يــخدم غـا سويعـات بالقيــاس
و يكمش بديه و رجليه ف الخضر و اليابس
و الصغير من الفجر يضرب السدرة و الكرفي
و فالعشية يشرب ميــهة و يدوزها بالحــرفي
الوجه تكمش و الزين ما بقى منو غير حروفو
يتوسد الضبرة و على فراش الحكرة يجر لحافو
الجاهل يتخير ف السكنى بين الجنانات و حضارة الروم
و العارف ف العلم يعمر الكريانات أو دواور الدوم
سعاد صالح البدري في 11/07/2012
0 رد على "شنو واقع ببلادي"
إرسال تعليق